رمضان خلص فهل علاقتك بربنا خلصت كمان ؟! معز الدين البقشيشي

رمضان خلص فهل علاقتك بربنا خلصت كمان ؟!

الشيطان رجع والنفس بتِلح والدنيا بتشدك

الهجمة المرتدة بدأت واللي مش هيثبت ممكن يرجع لنقطة الصفر تاني 

ربنا حذرنا وقال “إِنَّ الَّذِينَ ارْتَدُّوا عَلَىٰ أَدْبَارِهِمۡ مِنۢ بَعْدِ مَا تَبَيَّنَ لَهُمُ ٱلْهُدَىٰ ٱلشَّيْطَٰنُ سَوَّلَ لَهُمْ وَأَمْلَىٰ لَهُمْ” سورة محمد

للأسف مش كل اللي عرفوا الطريق كملوا فيه

فيه ناس شافوا النور وذاقوا حلاوة الطاعة

لكن رجعوا للظلمة بإيديهم

عرفوا الحق ومشوا فيه وبعدين سابوا الطريق

الشيطان زيّن والنفس مالت والهمة خفت

وإنت يا تري بعد ما ربنا هداك هترجع ؟؟

خلي بالك من دلوقتي علشان ما ترجعش تقول :

كنت في رمضان بصلي قيام

كنت بختم قرآن

كنت بتغير

الخوف الحقيقي إنك ترجع زي ما كنت أو أسوأ

قال الله “وَلَا تَكُونُوا كَالَّتِي نَقَضَتْ غَزْلَهَا مِن بَعْدِ قُوَّةٍ أَنكَاثًا” النحل

يعني متبقاش زي اللي تعبت وبنت وبعدين هدمت كل حاجة بإيديها

الهجمة المرتدة حقيقية

والشيطان رجع يشتغل بكل قوته

يوسوس يهون يفتح أبواب الرجوع

بس ربنا علمنا الدعاء “رَبَّنَا لَا تُزِغْ قُلُوبَنَا بَعْدَ إِذْ هَدَيْتَنَا” آل عمران

خد بالك العبادة مش موسم مؤقت

النبي ﷺ “كان عمله ديمة وكان إذا عمل عملًا أثبته” رواه مسلم

وقال “أحب الأعمال إلى الله أدومها وإن قل” متفق عليه

مش مطلوب تصوم وتقوم كل يوم

لكن خليك ثابت

ولو على حاجة بسيطة

ابدأ بـ

صيام 6 من شوال “من صام رمضان ثم أتبعه ستًّا من شوال كان كصيام الدهر”

صفحة قرآن

ركعتين ليل

ذِكر على الطريق

صدقة خفية

دعوة في السر

رسالتك لنفسك بعد رمضان

لن أرتد بعد الهداية

ولن أنقض غزلي بعد أن قوي

ولن أفتح بابي للشيطان من جديد

اللهم اجعل رمضان بداية وليس نهاية

اللهم يا مقلب القلوب ثبت قلبي على دينك

ولا تجعل للشيطان علي بعد رمضان سبيلًا